執筆寫此稿為凌晨一時，十分累，但無睡意。因為，剛參加「金曲迴響顯愛心」，音樂會中之勁抽 band sound，仍於耳際縈繞，歷久不散。加上多少酒精，仍high high地。

呢個音樂會，令我阿活有少少感觸。因為現代社會，強調冷酷，大機構多不重感情，對老臣子話炒就炒，喂，總之依照勞工法例，俾夠你就得啦，以後各不相欠，走啦！

其實，人乃感情動物，機構要員工忠心，就應該營造一種歸屬感。「得就得，唔得就忽得」之文化，當然乾手淨腳，只不過，人心肉做，你會否希望工作機構冷酷無情，只講金唔講心？

Uncle Ray八十大壽，見證一種已經遺失之機構文化－－溫情。

看官，請勿嫌小弟老氣橫秋，唉，總之年紀愈大，愈覺純功利機構戇居，將心比己諗諗就知，最低層次之管理哲學必為純買賣。

講番個party，不少新一輩歌手上台為Ray叔高歌賀壽，但，一到陳奕迅開聲唱Beatles名曲《Hey Jude》，嘩，簡直似「精英大師」上陣，實力彈離幾班。

久休之迅仔，正處top fit狀態，一開腔，絕對超晒班，慘被雪藏兩年，擺明係香港樂壇之重大損失。之咁，佢勝在年輕，你想整瓜佢？好難矣。

全個party，我阿活百分百enjoy。但有丁點遺憾－－Joe Junior及Teddy Robin等昔日巨星，皆無唱自己六十年代金曲。怕者，留番一次大型 60's Hong Kong Band Revival先晒冷卦。