「投資專家」老虎母，昨日打開報章，又口翕翕當秘笈︰「哈，若佢兩個係股票，我就多多都掃，入重貨等升值兼分紅。」

「喂，老婆大人，你講緊乜呀？股票只有隻既0者，邊有個架？」我伸個頭過去博鬧。

「話左你豬頭嘜啦，重成日扮英明神武！」嘩，神仙無咁靈，佢果然一野噴埋黎︰「我指果兩個－－古巨基同陳奕迅呀！阿姐擔保佢兩個雞年旺到你唔信。若係股票必賺梗！你話我話！」

「大人，古仔同陳仔的確走勢勁，但長渣會否……娛樂圈好邪架喎！」我又扮無知。

「拿，等為妻分析俾你呢個白癡老公聽啦。」老虎母蹺起二郎腿，煞有介事指手畫腳︰「第一、兩個都年輕，仍有大把日子，你估你咩！第二、佢兩個真係識唱歌，有音樂感，唔似其他充斥樂壇得把雞仔聲既所謂歌手。唱歌唔係唱樣，無歌藝點可以大受歡迎？第三、佢兩個由外形到性格到喉底，皆極具個人特色，一剛一柔，lum死不同年齡歌迷！」

「喂喂，點解呀？樂壇分析師？」今勻到我窒佢。「你重話做傳媒，正牌懵弊弊！」死，反彈添。「拿，聽住喇。陳奕迅係剛，充滿粗獷男子氣，當然煞食。古巨基呢，勝在成個乖乖仔兼怕怕醜醜，又久不久就喊，真係我見獨憐，見佢成面眼淚，年長女歌迷肯定會爆出強烈母性，獻出胸膛將佢一攬入懷安慰︰『乖下，唔好喊，終於輪到你威勒，俾心機唱啦！』 總之，活佬，雞年佢兩個霸晒，你睇我會否跌眼鏡！」