陳奕迅繼續行運一條龍

東Touch 2000年2月1日

記得周星馳先兩年有齣賀歲片叫《行運一條龍》，戲中星爺終日以溝女為樂，同「行運一條龍」好似扯不上關係！因為真正既「行運一條龍」應該好似陳奕迅咁：99年頭於各大樂壇頒獎禮中連奪幾個大獎，然後一年內更兩次奪得聲色兼備口碑勁好既個人演唱會，接住係2000年被各大雜誌點名，認定為歌神接班人，未來日子會同謝霆鋒係樂壇分庭抗禮！Good Luck成咁，點可以唔搵佢同《東TOUCH》讀者拜個『龍精虎猛』年，滲少少旺氣俾大家益下街坊呢！

童年發財運

Eason入行4年，近兩年先開始行事業運係不爭既事實，不過原來佢由細個開始已經有運行，而且仲係大家都恨既財運同貴人運添！

細個時，每年都會同屋企人去親戚屋企拜年，最鍾意去較為富裕既uncle度，一收到利是就同阿哥走入洗手間拆，如果個Uncle闊綽既，會對佢另眼相看笑得開心D。記得8、9歲果年，有個Uncle俾過封5,000蚊既利是我，之後仲用呢筆錢同媽咪開左個聯名戶口，不過後來個戶口唔知點解得番1,000蚊！

「龍」曆新年掘金運

入行之後，差唔多每年既新年都係工作中度過，今年仲要離開香港去第二度做野添！首先會去澳洲既墨爾本同黃金海岸登台，然後返黎香港1日就要飛去加拿大幫TVB做Show，成個農曆新年都唔會係香港。

少年出路遇貴人

係英國讀書果時，農曆新年都要返學，最多同幾個朋友仔去學校附近間唐人餐外賣店食團年飯。間餐館既老闆本身已經有5個仔女，但係都對我地好好架！就算平日都會煮D比較好既野俾我地食，有時仲有湯飲添！過年除左會叫埋我地去食團年飯外，仲會俾利是我架，雖然唔夠香港過年咁熱鬧，但係已經好好。

陳奕迅兔年樂壇成績表

6/99 推出廣東大碟《天佑愛人》
6/99 舉行1場《903狂熱份子陳奕迅音樂會》
8/99 推出國語大碟《婚禮的祝福》
10/99 舉行4場《陳奕迅99大個唱》
12/99 推出雙EP《幸福摩天輪》
12/99 《新城勁爆流行榜頒獎典禮》奪得新城勁爆歌曲《每一個明天》
新城勁爆男歌手突破大獎
1/00 《叱吒樂壇流行榜頒獎典禮》奪得：
叱吒樂壇男歌手銀獎
叱吒樂壇至尊唱片大獎《天佑愛人》
專業推介叱吒十大第8位《幸福摩天輪》
我最喜愛的歌曲《幸福摩天輪》
四台聯頒歌曲大獎《幸福摩天輪》

《十大勁歌金曲頒獎典禮》奪得：
十大勁歌金曲獎《幸福摩天輪》

《十大中文金曲頒獎典禮》奪得：
十大中文金曲獎《每一個明天》
飛躍大獎男歌手銅獎
十大優秀流行歌手大獎

龍年大躍進計畫

2月 與楊千嬅一齊擔任商台飢餓之星，2月尾仲會親身去印度作親善訪問
港台廣播劇《鹿鼎記》於2月28日開始播放，仲會有一連串活動配合宣傳
3月 開始灌錄第4張國語大碟
4月 往台灣做國語大碟宣傳，同時灌錄全新廣東大碟
與張柏芝合演電影《十二夜》於復活節上映
5月 推出全新廣東大碟