|
陳奕迅當這地球沒季節
東周刊 2000年9月28日
文：李翰斌
我們都當陳奕迅不是人，是神，是「E神」。
不過這個神，不要說拯救地球，就連自己的「四季」，也控制不到。
「別人話我扮大牌是對的。現在我的性格是墨爾本天氣，一天內可以有四季。」
好彩，這是他當天的第一個訪問，是春季。
所以，整個訪問，他都春風得意，春光明媚。
傳說，「E神」守護住自己的獅子座，每當有仰慕者抬頭望向他看守的星宿時，他都會叫得特別威武，而且，還會說笑、唱歌、食煙和除褲。
這次訪問，出口的記者得我一個，隨行的Fan屎女同事有五個，「E神」首先關掉自己的手機：「傾偈緊要D！哈！」
然後，大家齊齊圍�鬌央uE神」天南地北、霆鋒濠縈、老西激凸、玉置浩二LMF、Audi打Golf、李敏犯罪、生仔食煙……
這個「春天」，很多笑聲，很多幾句幾句的歌聲，也很大陣煙味。
霆鋒
霆鋒同我性格上最大分別，係佢無論有乜事，都一定會令身邊朋友開心先，然後將冤屈氣發洩在傳媒身上，我以前就衰格D，好多牢騷，平時未必會「發」出來，屈埋屈埋，但朋友見到我個衰樣，問兩句，我就忍唔住，講晒出來，朋友就會話：「嘩！乜你咁嚴重？早知唔問啦！」但我做人唔想分公私，想率性而為，依家其實自私左，想「發」就「發」，自己舒服左先，所以別人話我大牌。
由細到大別人都覺得我冇乜殺傷力，好隨和；但霆鋒個款鬼咁衰，第一次見到會想打佢，但識落，先知道佢都有戇居低能樣，跟我一樣！
盧巧音個花名叫「牢騷王」，因為佢姓「盧」，又好多牢騷；霆鋒就叫做「道理王」，最鍾意講道理；我就叫做「牢騷道理王」！
我同霆鋒話得做一世朋友，係因為我地一齊經歷左一D事，是別人不知，亦冇必要去解釋。當然好多事好難講，要睇大家堅唔堅持到，其中一個變，這段感情也會動搖。
錢
其實我可以去外國賣唱，你聽我，我已經好開心，可以唔收錢；但從參加「新秀」開始，知道在香港就是要賺錢。人永遠是貪心，賺了十萬，便想賺一百萬，個人會變得愈來愈Commercial。我以前夠講過唔會買歐洲車啦！但賺到，又覺得不如買部Audi滿足一下自己。
如果你問我想買間幾多錢既屋，我答唔到你。但我會形容間屋俾你聽，要有七間房，兩個廳，一間房放音樂器材、一間放衫、一間放玩具……要幾多錢？我唔知。但我知有間這樣的屋便會好滿足。
其實依家，我都已經好滿足。
食煙
我12歲開始，除了父母外，身邊個個人都食煙，但我沒有，覺得好討厭。19歲那年因為失戀，先開始食第一啖。
上次病時想過唔食，但都唔得，我真係好Enjoy食煙，願意Take呢個Risk。如果我生個仔，會同佢講：「老竇食煙，你試唔試呀？科學證明食煙會死人，但你係一個個體，條命係你既，你有選擇權，你自己諗清楚試唔試。」我覺得這樣教仔對佢比較公平。
自瀆
依家答記者問題好睇心情，無聊就亂答。好似上次我件衫印住「Masturbating is not crime」（自瀆不是罪）被人鬧不雅。後來李敏還在專欄內說，根據聖經所說自瀆確是罪。如果我要反擊，我可以話：「甚麼是罪？Crime是一個社會中違反法律的事，但社會根本就沒有說自瀆是犯法。聖經中指的罪，是原罪，是Sin，不是Crime。」但我覺得成件事好無聊，就話：「對唔住，我唔識呢個英文字，下次我買衫會帶本字典去。」
喊
你們有沒有看上次玉置浩二演唱會？唉呀！你們錯過了本世紀最正的其中一個Concert。我一共喊左九「鑊」！佢成隊Band都很投入，連打燈也完全投入。你覺得他們站在台上唯一的目的，就是唱好歌給你聽。聽完坐我旁邊的Deanie（葉德嫻）話：「我下次要見到你咁。」我好受寵若驚，我跟她不熟，原來她這樣看得起我。
Deanie姐也是這樣，她一站上台唱：「當我見到天上星星……」你覺得她只是很舒服的將自己感覺唱出來，我已經「咇」眼淚。她是第一個香港歌手令我這樣。點解LMF這樣受歡迎？也是因為他們唱的歌就是自己的感覺。
我也希望自己可以這樣。
這張碟有一首歌叫《K歌之王》，我錄時，錄完再聽番，總共喊左三次，無端端標眼淚水，好感動，歌詞好正，林夕是天才。唱到最後一句：「但你的呵欠，絕得不能絕，絕到溶掉我……」我已經成個喊樣。同以前《傷信》那種裝出來的傷感聲很不同，因為人成熟了。
開心
其實我依家傻傻地的性格，是受當年在英國讀書的影響。我覺得鬼仔冇乜機心，唔記仇。有人話新公司是非好多，但如果我花精神去諗邊個爆我（陰毒），就會唔開心，所以唔諗。狗仔隊我又唔理。你鍾意跟就跟，唔通我去皇室堡間加州紅唱K都犯法？
以前我會話偶像是張學友，覺得他好有目標。他跟我說做人要Be Professional（夠專業），唱歌就專業地唱歌，玩就專業地玩。我好同意。但近來我會說偶像是阿Lam，我覺得他生活得很開心，唔使宣布告別舞台，得閒便去打Golf。我唔似一D藝人，想有自己王國、自己網站、開間自己的集資公司。我開始覺得做任何事也要先Please自己，好似演唱會，我覺得熱，覺得悶，咪除褲囉！你寫我激凸，我其實冇野。不過我大髀真係好鬼粗！
我希望有一日可以得閒落Jazz Club彈彈琴，或者開一間像翠華的茶餐廳，鍾意就去滑雪，不過就唔使發相俾傳媒！
男人
其實男人都衰格，係賤格，但我自己係男人，冇理由踩自己。我做男朋友唔算好，唔算壞，OK啦。起初也沒想過跟現在的女友（徐濠縈）會是最長，有四年幾。其實你永遠也可以找到一個比現在更好的女友，但我是念建築的，22歲那年，我覺得這個夠好，已經決定了，要跟她一齊做一個大Project，一齊諗Idea，一路設計，一路傾怎樣去將我的建築物起到最好。有共同目標，這個建築物其實可以起一世。
春天請再來
訪問完結，春天開始溜走，Fan屎女同事亦心滿意足地溜走。
攝記準備開始拍照。
「E神」的夏日漸漸來臨，開始熱，開始想除褲。除了！就在女助手、女化妝和我面前除了。
輕鬆自若地換上另一條褲。相信我的五位女同事，都後悔沒有陪「E神」一起走到夏季。
生命跟戀愛，大抵每個人都曾走過不同的季節。就算只是匆匆來，匆匆去，看不清，留不住，其實也都沒有關係。因為，每個季節都可以再來，只要仍可活得像「E神」般輕鬆自若。下次約「E神」，希望還是可在春季。
|
