|
從躁狂戀愛到突擊結婚
陳奕迅鎖定徐濠縈
蘋果日報 2002年1月20日
陳奕迅與劉德華前晚瓜分了「四台聯頒傳媒大獎」，足證Eason過去一年在樂壇成績斐然，不過相對地，有關Eason的是非也是十分多姿多采。而Eason的率性，令他對感情方面亦同樣火爆、執著，但結婚對象，卻始終如一鎖定徐濠縈。
幸福摩天輪
陳奕迅（Eason）與女友徐濠縈相戀五年，兩口子同樣擁有剛烈的性情，在剛開始發展感情的頭三個月，二人幾乎天天在吵架，五年感情生活亦曾經因此出現過危機。
經歷分手珍惜所愛
「我咁大個仔，只係有過三、四個女友，而徐濠縈相信會係我嘅結婚對象。係我地拍拖既初期，我對佢係完全冇保留既，但佢就相反，連佢屋企都唔肯畀我去，問佢點解，佢又解釋唔到。有次我嬲得滯，走左去佢既屋企門口，發晒狂咁搖佢大門既鐵閘，後尾佢冇我辦法，先話畀我聽，因為佢屋企細，所以唔想我黎佢屋企，當時我話『0車！原來就係咁無聊既原因，早知唔使sai我咁多力氣啦！』
「徐濠縈好鍾意乜野都擺係心，唔容易同人分享佢既野，但呢幾年對住我都算乜都肯講，我地拍拖頭三個月日日嗌交，可能因為大家性格都係咁火爆啦！佢同我拍拖頭一個月，已經話想結婚，當時我只得二十二歲，始終覺得結婚言之過早，兩個人重需要時間去了解下。相處左一年，因為發生左一D事，我同佢重分埋手，後尾我地又走返番埋一齊，當時我諗，分開左重可以係番埋一齊，呢個一定係我既終身伴侶。」
苦心經營浪漫驚喜
Eason坦承與徐濠縈相處了五年，感情已十分穩定，所以彼此之間亦曾正式談過結婚的問題，但至於甚麼時候結婚，Eason卻堅持要保持一份神秘感。
「有D野講晒出黎就冇驚喜，可能聽日就同佢結婚都話唔埋，我好想畀D浪漫佢，雖然我工作忙，但一D特別日子，我都想畀D驚喜佢。好似有年佢生日（三月七日），我專登話要去台灣做野，唔可以同佢過，搞到佢失望左幾日，到六號果晚，我重專登去朋友屋企訓，到凌晨十二點先係佢眼前出現，搞到佢好感動。」
我甚麼都沒有
總結陳奕迅今年在各大頒獎禮所取得的獎項，Eason可說是大贏家之一，前途無可限量。但Eason的個人言論，卻經常引起非議，諸如較早前他發表不買三大天王唱片的言論，便掀起頗大的風波，更有人指他唱功有餘，內涵不足，一朝得志，語無倫次。
「我冇心去傷害人」
對此，Eason平靜地說：「我唔係話要幫自己辯白，但我當日所講既野的確被曲解，我真係冇心去傷害任何人，當日我係話有日係屋執CD櫃，發現黎明同劉德華既CD一樣係有咁多隻，張學友就係我一直好鍾意既歌手，所以一路都有買佢既碟，而近年黎覺得華仔同黎明出既唱片，吸引唔到我再買，就算連張學友既碟都買少左，反而學友會送碟畀我，其實呢D係好個人既喜好，唔係代表我唔尊重佢地。
坦率火爆EQ不高
「不過檢討番呢件事，我終於明白自己係藝人，可能一言一行會影響到某D人既購買慾，一D無心傷害人既說話，原來傷害左人都唔知，係呢方面，我會盡量改善下，以後講野會小心。不過我性格一向好率直，可能做完一排驚弓之鳥後，我講野都會一樣咁真。」
而Eason坦率、火爆的性格，近年亦經常令他在公開場合與傳媒發生摩擦。
撼頭埋牆嚇煞旁人
前晚他出席港台「十大中文金曲頒獎禮」慶功宴時，又出現一個活生生例子。當他接受華娛電視台訪問時，有人見Eason忽然撼頭埋牆，然後又表示要走入廁所冷靜，事後有記者問他為何撼頭埋牆，Eason竟反問：「撼頭埋牆動作好激咩？」
但昨日Eason所屬唱片公司負責人Lisa來電澄清說：「噚晚Eason係記者會做左好耐訪問，想轉個身透下氣，點知轉身就係一幅牆，咁D人就話佢撼頭埋牆，佢係廁所出黎，D記者係咁問佢點解咁做，有時做乜都俾人亂講，感覺係好難受。」
Eason亦坦承自己EQ不夠高，但他認為某小撮傳媒的工作態度亦有改善必要。
「早排係新城勁爆既頒獎禮記者會，其實我係好嬲，好想發脾氣，當日有天王唔睬我，當時我只係覺得無奈，並冇為此唔開心。但令到我好嬲既事，係大會司儀係台上講緊野，台下好多人好唔尊重個場合，自己係度傾偈，又有記者走黎叫我寫揮春，人地拎咁多錢開個記者會，究竟大家可唔可以尊重下個場合？」
Shall We Talk
陳奕迅父親陳裘大早前因為涉及一宗受賄案，目前仍被廉政公署調查，對於此事，Eason不欲多言，但卻透露此事亦影響到他的終身大事。
學習與家人談心事
「雖然我有諗過結婚，但屋企發生左事，等件事過左再講啦！而家有時間，我會盡量同爹D、媽咪、婆婆相聚下。我係英國讀左九年書，同屋企人關係好疏離，就算同父母通長途電話，都係講埋晒『今日你食左飯未，天氣凍著多件衫』既瑣碎話，好少會講下內心野，但其實當時我一個人係英國，最想得到既，就係家人既精神支持，金錢反而係其次。
「不過，我都慶幸家人送我去英國讀書，等我可以學到咁多野，而家到自己出左黎社會做事，開始明白到，父母出黎社會做野既壓力同忙碌，對佢地多左一份體諒之餘，重會多D去關心佢地，我重學會多D同屋企人分享自己既內心世界。」
不滿外婆無辜受驚
現時每逢大時大節，Eason都會到跑馬地探望外婆，對老人家十分有心，不過他對部分記者不問情由，便拍攝其家人的照片，卻極為反感。
Eason回憶道：「早排平安夜，我同女友去跑馬地搵外婆食飯，有記者衝埋黎係咁影我外婆，當時我真係好嬲，因為佢地嚇親我婆婆。我食呢行飯，食得鹹魚抵得渴，亦知記者都係打份工，但我真係唔想連家人都要承受埋呢分咁重既壓力。」
後記：
不少人指Eason臭口，經常開罪人，但Eason在訪問當日，卻告訴筆者他在英國留學期間，每日刷五次牙。問他為何要這樣做時，Eason笑說：「因為冇乜野做，得閒得滯，咁咪起身刷一次，食完早餐又一次，食完午飯再一次，到晚餐一次，上床前咪再刷一次囉！」
回香港後，Eason的習慣雖然改變了，但仍然維持早、晚各一次，看來Eason對個人的口腔衛生十分注重，應該不會臭口吧！
|
