徐濠縈妙手療春
陳奕迅計劃結婚退休

東方新地 2002年5月2日

四月十五 ，陳奕迅在台灣校園騷表演時跌傷，需要縫針，留院休養五日。上週五(廿六日)開始，Eason傷後首出席宣傳活動，接著連續幾日四出舉行簽唱會，又跪又跳非常活躍。

本週二(三十日)，Eason在台灣接受本刊獨家專訪時表示，今次受傷令他與女友徐濠縈的感情邁進一大步，並開始計劃婚姻大事；對於外間懷疑他性能力及生育問題，Eason揚言將來一定有仔生，更打算退休做全職「湊仔公」！我們更立即致電徐濠縈，聽聽他對男友一番肺腑之言的回應。

感情：難得有個好女仔

記：今次受傷事件，對你同徐濠縈的感情有影響嗎？
Eason：今次受傷的確增進左我地既感情，事發之後，我第一時間打電話俾佢，話佢知傷勢唔算好嚴重，費事D報紙渲染左令佢擔心。呢段日子有佢照顧我，又幫我洗傷口，我好慶幸有個咁好既女朋友，難得呢個世界上有個女仔對我咁好，我應該珍惜。
徐：唔止我一個對佢好，仲有佢媽咪呢！其實我都無做過D乜，淨係陪住佢，幫佢洗下傷口。(有無鼓勵佢？)唔使用到鼓勵咁誇張，好小事0者！不過我最開心係佢多左時間休息，總算係因禍得福，可以乘機訓多D，我地全家都係咁諗。

行房：你又知我未試過

記：外間最關心受傷會否影響你的性能力？有中醫話100日後先可以行房喎？
Eason：醫生都話無事咯，之前覆診已經話我好番晒，我遲D返香港再check。至於性能力，我仲未知喎，不過我可以好肯定話俾大家知，一定唔駛等100日都搞得！(女友有無擔心你日後既性能力？)你又知我未試過？哈哈，講笑0者，我仲未試過。
徐：我真係唔知佢得唔得喎，我都無特別留意，連100日行房，都係朋友睇完報紙話我知，醫生又無同我講幾時先搞得。其實我無乜所謂，呢樣野順其自然啦，都一齊咁耐咯，到時得咪......(咁幾時搞呀？)咁肉麻既野點同你地交待喎！

BB：要幾多個都得

記：經過今次之後，有無考慮過生BB既問題？
Eason：我好鍾意細路仔，將來一定有仔生，性別不拘，生幾多個都得，總之一定要有。而且我已經諗好將來會退休專心湊仔，朝朝陪佢地食早餐，開車接送返學，仲要親自教佢做功課，邊會有時間唱歌宣傳？
徐：都有諗過結婚生仔既問題，不過無話一定要生BB，我無乜要求，唔一定要住大屋、楂靚車、生幾多個仔女，總之到時想做咪做0羅！

結婚：一定秘密進行

記：其實你同徐濠縈同居咁耐，諗住幾時結婚？
Eason：同居同結婚有咩分別0者？只不過差張紙，女人要名份嘛，其實我同佢都傾過結婚生仔既問題，而家亦有咁既計劃，不過我未有經濟基礎，所以遲D先實行。而且人地愈想我做，我就偏偏唔做俾人睇，就算將來我地真係結婚，都一定會秘密進行。
徐：我未PLAN架，等佢賺錢賺到下半世唔使憂先算啦，而家經濟環境未容許生仔，過幾年都未遲，我唔急住嫁。