陳奕迅 今天應該很高興

新Monday 2002年8月2日

文：謝芳芳

有些人「生活是為了吃飯」。
有一些則「吃飯是為了生活」。
相信只有後者才可活得快樂。
陳奕迅是典型的獅子座。
積極、權威、幽默、情緒化但樂觀。
而且還能將歡樂感染身邊的人。
快樂的陳奕迅，其實剛從失落谷中逃出，他不知明年今日會點，但他今天很高興，而陳奕迅必定屬於「吃飯是為了唱歌」的人。

舊路送死

以前從來冇諗過自己一句說話一個動作會變成第二日報紙既頭條新聞，所以前排發生「果件事」，真係令我好唔開心、好煩惱、手足無措。一下子心態上未能適應到，而家開始慢慢調校番。

記得舊時做一D大Show，係後台化妝間會有好多artist好多記者，我會周圍紮紮跳玩得好開心。不過，而家就完全相反，變得好怕呢D場面，於是自己會選擇避開，然後一個人靜一下，冇辦法，你用火燒過一隻螞蟻，之後其他螞蟻一定唔會再行舊路送死，人亦一樣。

我係好鍾意玩，但係當大家都唔識欣賞、唔覺得好笑既話，咁我咪唔玩0羅！其實我仲好有火架，不過唔會再公開發作，所以我身邊既人最受氣，我唔會諗身邊既人有幾多係講真說話，好多時佢地講乜都會信，好似有時突然加左job，而我係唔知，但佢地話一早同我講左，我都會信佢地，因為我成日唔記得野。

鬼咁浮誇

我唔會同人講：「報紙既野全部假架！唔好睇呀！」真真假假應該留俾讀者自己判斷，有D野你信就係，唔信就唔係，當然我絕對認同報紙既影響力好大，我聽過有個阿媽同D仔女講：「陳奕迅以前幾得意、幾過癮，唱歌又唔錯，而家就古靈精怪、鬼咁浮誇。」

我知道後真係有去反省，覺得以後出黎都係正經D好。

其實，基本上我唔介意別人點睇我，夜闌人靜都唔會諗大家眼中既陳奕迅係點，因為而家夜晚我搞電腦做音樂，所以根本冇時間諗咁多野，哈哈。今年我接左七部戲，做音樂既時間真係好少，好似今次新碟搵左四個一直合作既監製同填詞人一齊合作係我既諗法，輝陽同林夕果隻，會係輝陽認為好而又岩我既野放落我度，而王雙駿同Wyman果隻就會有好多我地大家既idea，不過，未來應該會同多D未合作過既監製及填詞人試下新火花。

一世做呢行

我唔夠膽講我會同霆鋒一世都係好朋友，但係我會好珍惜呢段緣分，我地未試過嗌交，最多有時會火羅下對方咁，我好支持佢作出休息既決定，如果搵夠又完全冇後顧之憂，我都想抖下放下假，（而家重未搵夠？）梗係未啦！有好多野要供架！而且屋企有野煩，不過我就一定唔會引退，我已經決定一世都會做呢行，將來唔做幕前咪做幕後囉！

Edison曾經問過我：「如果做寫字樓同做歌手都一樣搵到咁多錢，你會點揀？」

我諗，我都會揀番做呢行，其實有時覺得自己真係幾幸福，可以做到一份自己鍾意，又有興趣既職業。

祝你明年今日生日快樂

這個訪問於7月28日進行。
前一日7月27日，Eason人在北京，與身邊老友及另一半度過牛一。
再前一日7月26日，我在餐廳聽Eason的〈明年今日〉迎接生日。
今年Eason的生日願望是希望身邊所有人平安健康。
而我則希望身邊的人快樂，特別係常受我氣那些。