楊千嬅兩段情皆被第三者介入

東方日報 2002年9月9日

楊千嬅的感情生活，不是屬於多姿多采那種，除了剛出道時傳過她跟陳奕迅（Eason）拍過拖後，廣為人知就只是跟鄭中基（Ronald）的一段戀情，可惜兩人甜蜜溫馨的日子短暫即逝，外傳兩人情變皆因第三者張柏芝的介入，自此千嬅與柏芝交惡的消息不脛而走；最巧合是千嬅與徐濠縈亦鬧過不和，同樣是為了一個男人Eason，有說當年千嬅是被徐濠縈撬牆腳，一直以來千嬅對感情事都低調處理，在今日本報的專訪中，她首度徹底剖白她對Ronald的感情，亦親口坦承與張柏芝、徐濠縈不是朋友。

千嬅坦言與張柏芝稱不上是朋友，她說：「只可以話係點頭之交，（做唔成朋友，關唔關當年盛傳柏芝係你地既第三者件事？）唔係太關事，呢D係緣分0者。（柏芝同Ronald既緋聞係真定假，你知唔知真相？）我依家唔想再講，總之我好清楚發生乜事，呢件事到依家已經三年，對我黎講已經唔需要去知真定假，只不過係一個經歷。」

改變左陳奕迅性格

盛傳千嬅與徐濠縈亦因Eason而不和？千嬅沒有否認，卻以一個另類的暗喻說：「手續辦得清楚既時候冇問題，乜人都可做朋友，呢個世界係圓既，但手續辦唔清既時候，同埋關乎個人喜好問題，做唔到朋友我唔介意。可能今年做唔到，出年做唔到，可能十年後做到呢，我唔敢講同呢個人唔係朋友，又或者一生都係朋友，我都驚俾人抽後腳，話唔定五年後大家溝通到可以成為Best Friend。」

問到千嬅眼中的柏芝和徐濠縈，她好爽快笑說：「我覺得以柏芝既年紀，有咁大鑊既事，佢都幾硬頸、幾硬淨既人，我都係硬頸既人，但大家係唔同方面既硬頸，我覺得徐濠縈開始係一個賢內助，因為以我認識既Eason，由一個細路仔到最近成個老竇咁，佢改變左陳奕迅好多，Eason咁定性都可能因為佢。」

同鄭中基仍有機會

至於曾經讓千嬅深愛過的Ronald，她真心表示Ronald是他在圈中最相信的朋友，她坦白說：「我好放心同佢講好多野，因為呢個人我好了解，佢亦都好了解我份人，就算依家有乜事佢都會係第一個打電話俾我，（有冇機會再一齊？）五十五十，唔可以話大家Get Along（一齊）既機會係冇，但大家既追求同要求都唔同左，（對佢仲有冇感覺？）唔係當初認識既感覺，果種感覺係有感情既，因為大家畢竟相識了六年，唔好講話男女朋友，都算犀利啦。」

千嬅感性的說：「由情侶分手到做回朋友，經歷左好多野，大家都有憎過大家，甚至唔睬大家，直至佢係美國發生意外（醉酒鬧機）之後，佢有打電話俾我，我都好擔心，當時我身在台灣唔知乜事，以為佢有生命危險，果下好驚，係果一刻好多野大家原諒左大家，大家已經冇乜事，可以再講到野。」

其實Ronald有甚麼地方吸引？她認真表示：「我覺得佢同我講野係好真心，係其他追我既男仔做唔到既。（同其他男仔相比，係咪對Ronald會加分？）會多左D感情係度，佢會令到我知自己要乜，因為自己係睇唔到自己，但佢會俾我知道自己追求邊類生活，好似係我寫照咁，總之我好珍惜Ronald呢個朋友。」