|
陳奕迅 - 谷到爆
東方新地 2004年3月24日
陳奕迅的歌，我聽得多，他的戲，我幾乎都看過，甚至他的傳閒，神經質發火鬧人，滔滔不絕牢騷很多，都略略聽聞過。但是訪問陳奕迅，話題應該離不開他女友，他父親，以及他的是非。1月5日，父親陳裘大被判入獄七年，陳奕迅步出法庭時，神情肅穆，逾百記者一湧而上，他仍然大方企定定影，還禮貌地問句：「影夠未？」。接下來一個月，陳奕迅照常開工，去台灣宣傳唱片是「死頂」，在港拍戲有講有笑是「苦中作樂」，就連女友徐濠縈行街買衫都是「彌天大罪」！既然行是錯，企又錯，說與不說都是錯，陳奕迅說：「基本上我失望得好緊要，但又可以點？無反應就係最好o既反應，希望傳媒無癮，就自然唔會煩我！」陳奕迅說，過去一年，實在太多新聞，自己捱得辛苦，記者追得更苦，答的不煩，問的也嫌悶，是時候o抖一o抖。可惜，陳奕迅似乎不屬於坐言起行的人，一邊不停嚷著要封口，要o抖o抖，話匣子打開，怨氣卻又衝口而出。最怕講多錯多，還是挺起胸膛說下去，因為陳奕迅是這樣憤怒，苦水太多，不吐不快！
我要唱
作為一個歌手，陳奕迅領的獎夠多，出的碟夠賣得，演唱會亦夠賣座；作為一個演員，八年來拍過廿部戲，小生、花旦、賤人、鹹蟲統統做過，新作《大佬愛美麗》，更被塑做為一個「萬梓良式」的基佬，機會總算比人多，但陳奕迅竟然不覺幸運，寧願國歸舞台，一直唱下去。
新：《大佬愛美麗》中，首次扮基佬，感覺如何？
陳：其實我今次唔係做基佬，只係劇情誤會o者。反而扮萬梓良o既演繹手法，係導演要求，我唔覺好笑，但佢想我誇張o的，我咪照做o羅。
新：同導演馮德倫合作成點？
陳：拍呢部戲之前同佢唔熟，但合作之後，發覺佢好稱職，準備工夫做得好足，我只需埋位盡番演員o既責任就OK，好舒服。
新：之前有傳你不滿公司幫你狂接戲，你係咪唔鍾意拍戲？
陳：我唔係唔鍾意接咁多戲，只係唔鍾意做一o的我唔清楚o既工作，因為我討厭馬虎，如果唔了解劇本、唔知拍乜，我怕做得唔好，所以會𤷪𤺧。基本上我係一個你唔俾我綵排，我就寧願唔騷o既人。
新：拍戲多係咪令你無時間唱歌？
陳：過去呢四年，我試過多好o野，電影、廣告，我玩夠喇，我覺得係時候放多o的時間o係音樂上。我最大o既心願，係去唔同地方開演唱會，如果要搵錢，開concert都賺到，點解一定要拍戲呢？上海、北京、台灣、星馬等地，成日都有人問我幾時開騷，問到我口啞啞，我每次花好多心血去錄一隻唱片，但唔夠宣傳，時間用哂o黎拍戲，令我好唔開心。
我要呻
做藝人要慎言，可惜八年的訓練，始終未能令陳奕迅成精，久不久就說錯話、發錯脾氣、做錯反應，結果入行愈耐，愈多牢騷。看不過眼的事情太多，能改變的事又太少，儘管陳奕迅再三說做人要化，偏偏不平則鳴的性格，令他做人太辛苦！
新：呢兩年係咪好唔開心？
陳：係，因為太多focus（焦點）擺o係我身上，傳媒問太多私事令我好煩。我明白可以學我老友（謝霆鋒）咁，兩手插袋行o左去，乜都唔講，但遇o岩有日心情好，講o左兩句，咁就大鑊，接住落o黎就更多問題要我回應，好辛苦！
新：你可以選擇性回答，或者索性唔做訪問？
陳：我係可以嘗試唔再講o野，但捱到幾耐o者？一日做藝人，一日都要宣傳，無辦法！而且我唔識揀，基本上我係一個乜都夠膽講o既人，我唔識死，但依家會好驚o羅，講得太多，身邊o既同事、朋友都會話我，原來我連做番自己都唔可以。
新：點解咁多牢騷？
陳：因為我做人太執著，連o係街見到人亂拋垃圾都會唔開心。我份人變得好快，呢一刻好開心，轉頭可能好down，簡單o的黎講即係麻X煩！藝人個個都情緒化，可能我有情緒病，因為我成日都失眠，都算係一種精神病，有無諗過睇醫生？有o架，不過我唔主張食藥，所以成日想放假，或者續約前先o抖抖。
我女友
一直以來，大部分關於徐濠縈的報道，不外乎是對記者態度惡劣，大花筒月使幾十萬，更甚者，是一再盛傳Eason同徐感情轉淡，說分手都說足兩年。這段關係之中，徐的角色是大反派，而保持緘默的Eason，自自然然擔當了受害者角色。
新：你介唔介意外間認定徐濠縈係惡女人？
陳：我戥佢唔抵，實情佢好無辜，因為有部分記者真係好過分，竟然問佢：「陳Uncle坐緊監，點解你仲有心情shopping？」嘩，點解可以問得出咁離譜的問題？如果換轉係我，我點止發火鬧人，動手打佢o忝呀！你o地到底想佢點o者？o係屋企守寡呀？係咪邊度都唔去，咩都唔做先算o岩呢？
新：你女友係咪好大使？
陳：我覺得佢好冤枉，其實佢唔算大使，我試過一次陪佢shopping，原來女人只係enjoy試o既過程，佢試完一大堆，搞o左好耐，吓，點知一件都唔買o架？我平時唔會試，一睇中就要買，而且男人玩o既o野仲貴，音響、車、玩具，買個iPod都幾千蚊啦！
新：你o地係咪經濟獨立？
陳：咁又唔可以咁講，你o地覺得佢游手好閒o者，其實佢好忙，佢對fashion好有興趣，又有能力賺到錢，依家佢幫I.T做緊o野，自己都有能力賺錢。
我大使
過去一年，一再傳出陳奕迅經濟陷困境，為了父親陳裘大的官司，花費不菲，陳父亦曾在庭上直認兒子要供養女友，開支很大。結果陳奕迅年拍六部戲，與英皇傾續約，統統都被視為撲水救父養女友之舉。一直被視為賺錢機器的陳奕迅，卻堅稱自己才是大使。
新：你爹o地單官司搞成點？係咪要使好多錢？
陳：呢件事我唔想再講，我只係盡番做仔o既責任，無乜特別。其實因為呢件事，已經搞到我好攰，唔願出街，更加唔想多講。
新：你點大使法？
陳：我購物慾強o羅！好似單車我都有三架，包括用二萬幾蚊砌o左架爬山單車，生日用七千蚊買部BMX花式單車送俾自己，仲有架o係日本抬返黎，但只係踩過一次。書我都有好多，去親台灣「誠品」會掃一大堆，但好多都未睇過；仲有結他都有十支，支支過萬，但唔係好識彈，其實我先係最大使o個個。
新：瘋狂購物算唔算係減壓方式之一？
陳：都算o架！因為我鍾意收藏，乜都買得一餐，平時去到邊都攞火柴盒返屋企，見到靚o既火機又會買，眼鏡戴過一次又收埋，仲有幾十部Lomo（相機）呢，全部都唔捨得用，有用o既我會買多一件，收收埋埋，得閒攞出o黎睇吓、摸吓，已經好開心。所以我有諗過將來開番間陳奕迅榑物館，收$10入場費，賺吓錢都好，哈哈！
新：係咪因為自細屋企縱容你瘋狂購物？
陳：o岩o岩相反，細個屋企乜都無，打開雪櫃淨係得三樣o野，當歸、雞蛋同生命麵包，無可樂、無零食，肚餓偷江瑤柱食咋，勁慘！如果有罐新東陽o既豬肉鬆，嘩，已經開心死，因為慣o左乜都無，所以依家要彌補番。
在台上 我點都得
訪問期間，陳奕迅多次強調自己是歌手，只有台上才最自在。「只有o係演唱會上我先可以做番自己，最relax，講乜都得，頭場尾場咪巡例乖o的俾記者影相交差，中間我爆肚又得，爆粗都仲得，個騷我o既，你吹咩？」這天，陳奕迅站在梳化上拍照，興之所至，突然LMF上身，rap了一大段，「我覺得呢個發洩方式好正，有機會我一定重組LMF，自己玩埋一份。」原來他是LMF
super fans，一直渴望合作，更加渴望可以好似LMF一樣，在台上大唱粗口歌，旁若無人，盡情發洩。不過，陳奕迅不是LMF，所以玩到high時除褲露pat
pat，當眾著粗口tee教壞細路，你可能選擇唔記得，可惜觀眾個個都記得。所以，即使在台上，都並非點都得。
|
