|
《大佬愛美麗》專訪
大陽報 2004年4月4-6日
三個大佬各有所愛
馮德倫珍藏藍潔瑛靚相
影壇最近多了一個大佬叫馮德倫。
吳彥祖、陳奕迅、化妝髮型Styling、電影公司員工，上上下下都這樣稱呼他。話明大佬愛美麗，自然想起馮德倫愛莫文蔚，但實情令這個大佬神魂顛倒的，原來是藍潔瑛！
馮德倫首次執導電影《大佬愛美麗》，把這個影壇新大佬眼中最美麗的東西放進去，包括同性戀者的美麗角度、吳彥祖與元彪的美麗父子情、媲美外國電影的色彩效果，當然還有這個大佬眼中最美麗的女主角莫文蔚（Karen）！
看在別人眼中，Karen是擁有四十二吋長腿、性感又野性的美人，但在男友馮德倫眼裏，無論戲况戲外，均看出另一種美麗。
馮德倫：過往好多人搵Karen拍戲，理由係因為佢好戲，所以做親都好似《食神》、《墮落天使》呢類難度高既角色，好少搵佢做一個普通靚女。我今次要佢做一個有情有義、好街坊、好普通既靚女，即係做番佢自己！我將佢拍到有咁靚得咁靚就夠！其實Karen既靚係發自內在，佢做好多善事，但唔會好似一0的人咁有目的。佢出自真心鍾意動物，鍾意幫人，所以佢屬於從心靚出黎既女仔！
問這個大佬最愛哪位圈中美女，最初以為他會賣花讚花香點名Karen，殊不知最吸引他、甚至把照片珍藏在銀包的女星，並非理所當然的莫文蔚！
最愛並非莫文蔚
馮德倫：係藍潔瑛！佢係唯一令我要買佢張相袋係身既女星，佢當年真係好正，「靚絕五台山」絕非浪得虛名！（見到佢既現況，會唔會感到唏噓？）咁多年，唔好話係佢，我都可能變成一個小巴佬！
在旁的另外兩位大佬陳奕迅與吳彥祖，聽到要揀選圈中靚女，開始面有難色。
陳奕迅：我唔可以講第二個，我驚我屋企既野會爛晒，哈哈！
馮德倫：你屋企既電話已經爛左幾個啦！
陳奕迅：我覺得鍾楚紅好靚，我心目中既美人就係好似佢咁，有一種好爽朗嘅感覺。我媽咪後生時好似鍾楚紅咁靚！
吳彥祖：黎緊我要拍幾部戲，我驚到時俾佢地問點解唔揀佢，可唔可以唔揀？如果要揀，我覺得王祖賢果種一把長髮、一雙長腿，係女人中最經典既靚！
油頭粉面基味濃
吳產祖嚇親老竇驚死冇孫抱
在《大佬愛美麗》中飾演「攣」大佬的吳彥祖，現實中憑著一副精緻的五官，升成為同志搜獵的目標。這天與馮德倫、陳奕迅沒有談談情，但講講基之下，吳彥祖自爆曾遭父親懷疑他是「基民」。
由出道一部《美少年之戀》到《大佬愛美麗》，吳彥祖都扮演同志。現實生活中，吳彥祖亦與「基」有緣，認識不少「攣」朋友，當中更不乏追求者，連大佬馮德倫明知他有女友Lisa S.，仍不禁問：「有冇人懷疑你係基？」
吳彥祖：有呀！中學時爹地見我用好多Hair Spray同Gel，即刻質問我做乜用埋咁多呢D野，仲問我係咪基，估唔到Hair Spray同Gel可以令佢聯想到呢樣野。
陳奕迅：你爹地係咪覺得應該用髮乳先係Man。
吳彥祖：可能我唔上妝，所以拍戲時搽少少粉底就會俾人以為係，我係百分百既「直」。
陳奕迅：可能你拍《美少年之戀》拍得好有說服力，哈哈！但點解從來冇人問過我係咪基？
馮德倫：只會有人問你係咪踢波架！見你有對甲組腳。
吳彥祖：有人問我係咪基，其實佢地係想問我有冇興趣，試過幾次係酒吧有同志想追我，佢地會好直接問我係唔係，我Say No，佢地就唔會0徙時間。其實由細到大我都接觸好多基既朋友，我一D都唔抗拒，對我黎講佢地同普通人一樣。正如我欣賞男人同女人角度都相同，都係重視內在美多於外在，好似周潤發未必係一個靚仔，但佢一個笑容，一個眼神，係好有魅力，好Warm，覺得呢類男人好吸引。如果拍戲要我揀咀男人定女人，我就寧願咀男人，因為咀男人一定冇Feel，唔會想其他野，冇任何顧慮，只需顧技術上問題就得，咀完就Cut。
難忘與馮德倫激咀
馮德倫：我就寧願咀女人，咀男人我覺得好難受，好似果時同你拍《美少年之戀》要咀，心想收左錢冇辦法，拍時仲同自己講，要一Take過，千祈唔好唔收貨。我真係好佩服偉仔同哥哥拍《春光乍洩》時狂打車輪。
吳彥祖：果次同你咀對我嚟講都係一個犧牲，雖然我知好多人想咀你，但我就唔係好恨，因為你個咀好多鬚根。真係多謝今次你拍《大佬》唔使我再咀你。
馮德倫：你個唇薄到死夠唔好咀啦！
陳奕迅：難唔難受睇下點咀，視乎有冇伸舌咁啦！不過咀男人對我而言，心理上真係好大犧牲。所以我只係做到甲組腳，做唔到美少年，連大佬都係猛車邊。
公開送花一條心闖情關
陳奕迅為愛變傻佬
被喻為港版車太鉉的陳奕迅，原來在現實生活中比車太鉉還要傻！事緣於六年前，他已經跟女友徐濠縈上演了一幕真人版「我的野蠻女友」，大佬Eason為了愛情，未必美麗，但絕對可以很浪漫！
愛情當中，沒有分大佬、細佬，曾經在老闆楊受成辦公室看見「寧可採深山之茶、莫可飲花間之酒」對聯的陳奕迅，認為對愛情專一絕不戇居，但為愛而犧牲，也絕不是大佬所為。
陳奕迅：可以為愛情犧牲D乜？我係唔會為愛情跳樓、燒炭既人，我諗拍戲先會有呢D野，不如你問我，如果阿媽同女朋友跌左落水，我會救邊個先？其實親情、愛情都係愛。
馮德倫：你有兩隻粗髀，佢地一人攬住你一隻髀都得啦！
陳奕迅：死喇！搞左個陷阱出黎畀自己踩添！我答你，我諗我會救左阿媽先，因為我女朋友識游水！
馮德倫：我就唔識游水，兩個都救唔到。
陳奕迅：即係Dying Together！（死埋一齊）
吳彥祖：犧牲唔係單方面，係雙方面架。
吳彥祖英雄救美
為愛情犧牲，三個男人都說No Way！不過，Eason自爆曾為了至愛，竟破天荒做了一件傻事，就是在大庭廣眾下首次公開送花給女友。
陳奕迅：果時我入左行兩年，已經出左唱片，佢（徐濠縈）有次去行Fashion Show，我果日唔知點解心血來潮，特登走去買左好大紮花送入後台，係眾目睽睽下送畀佢，我覺得真係好鬼尷尬。其實當時只係想表示自己既支持，雖然我已經一支箭咁衝入後台，但所有人既眼光都係話畀我聽，果一刻我好似個傻佬咁！其實我份人一向唔浪漫，果次都幾大挑戰架！
馮德倫：你係咪真係咁專一呀？
陳奕迅：係呀！不過我都鍾意睇靚女架，讀書果陣，我鍾意左幾個靚女，不過唔敢表白，因為我知道，鍾意我既都係豬扒，因為佢地欣賞我隻髀！
馮德倫：我都有過花心階段，我覺得每個人都會經過，但就唔係一腳踏兩船，雖然傳媒成日話我係（花心）。
吳彥祖：女人基本上都幾麻煩，仲要咁多個，咪更加麻煩！我曾經為左女朋友打交，當時係日本，為左保護佢，同一大班男仔打，呢D咪係戀愛中意想唔到既行為囉！
|
