陳奕迅反擊戰

壹週刊 2005年05月26日

在很遠很遠的銀河系，武士陳奕迅脫離了英皇帝國，被流放外太空，前路不明……

雌伏期間，銀河系崛起了新四大武士，由「校長」冊封，陳奕迅榜上無名……

禍不單行。陳奕迅父親受賄罪成，女朋友被踢爆揮霍無度，負面消息不斷……

銀河曆二○○五年，簽了新經理人，改投新唱片公司，做了父親，武士陳奕迅正式反擊……

以下是陳奕迅透過銀河系廣播系統發出的反擊戰宣言：

「大家都怕死，唔敢郁，搞到成個環境好悶。你地究竟等乜野？

繼續等落去，只會愈來愈無樂趣。睇我出黎點搞事啦！」

銀河系的一班怪獸、複製白兵、機械人，以為陳奕迅經一事長一智，女都生埋，應該收埋激光劍，從此聽聽話話做一個不再生事的武士……

陳奕迅說，性格難改……

Eason Strikes Back。

前傳

由陳奕迅第一日宣布簽陳家瑛（王菲經理人），改投新藝寶唱片公司，跟李克勤、許志安同系，已經積極邀約訪問。結果，陳奕迅要北上拍劇，替中央電視台宣揚反歧視愛滋病患。訪問告吹。新歌《夕陽無限好》都派上台了，陳奕迅今次說要全情投入錄音，所有訪問一概押後，要待唱片製作全面完工，至開始宣傳。

一心收復失地，不由得不加倍認真。

險中求勝

陳奕迅終於在正午十二時到達影樓，踩了一對涼鞋，頭髮蓬鬆，企直都沒有力，像隨時會入睡。

本來打算索性起條題叫「黑帝君臨」，黑面個黑。

喝了兩啖熱奶茶，情況好轉了，開始將新歌逐首逐首勁歌推介，現場演繹。

足足兩年無出唱片，休後復出，陳奕迅覺得自己似游回浮台，睇見隔籬左右個個小心翼翼，擔心俾側邊的競爭者搶位，郁都唔敢郁。「我都驚。我驚跌番落海，海入面有鯊魚。但係我更加怕悶。

「點驚都好，我就係要 浮台上面跳來跳去，最好搞到成班人塌晒。

「我鍾意險中求勝！」

陳奕迅補充，與其說是險中求勝，不如說是險中求快樂。停工期間，李克勤、古巨基、梁漢文、許志安被譚詠麟封為「新四大天王」，陳奕迅想都不用想，第一時間反應：「好彩我無份！

「不是想得罪人，但係好老實心底果句，呢個term，真係有d娘。」

娘？算不算吃不到的葡萄是酸的？「我最緊張自己個品牌，如果俾人叫做什麼新天王，真係幾娘架！」

還解釋，因為自覺好運，天性又樂觀，這年來，雖然去頒獎禮只能夠擔當表演嘉賓，被其他對手紛紛超前，也沒有半點徬徨。「我知道之前累積了好成績，儲了一百蚊，到今日應該仲有三十幾蚊剩。咪再儲過羅。

「好在未用到負數，要周圍問人借。話徬徨，第一次轉會收成千萬，今次乜都無，咪仲值得徬徨？」

眼見昔日稱兄道弟的謝霆鋒越沉越低，陳奕迅還有心辯護：「你話佢俾負面新聞拖垮，換個角度，都可以話佢集中火力打大陸市場。」

真係好樂觀。

搵少好多

也許正因為樂觀，才會有足夠決心離開英皇。

「以前係先收一大筆錢，再做；而家係斷job計，做一單收一次。 時真係賺到 ，而家就搵少 好多好多。

「不過，我願意咁樣喎。」

過來人坦言，英皇的強項是資金龐大，足夠為自己提供富裕生活。「一個歌手風光的時間得好短，後生唔搏，唔通五十幾歲至出黎同班靚仔爭份四千蚊人工既護衛咩？

「我好記得簽約果日，李進（當年英皇高層）問我想要乜，我答要層樓。結果，我真係買到。

「係無諗到辛苦成咁，賴晒野。」

陳奕迅一直以為，可以一邊拍戲，一邊錄音；但最後工作量實在過分沉重，終於應付唔到。「唔夠時間，人自然就會馬虎。我過唔到自己個關。

「我唔想變成純粹為賺錢而唱歌。」

在英皇的最後日子，陳奕迅越來越迷惘，明明新歌一樣好聽，點解無以前咁受歡迎？係分心拍戲唱得唔好？抑或無時間兼顧宣傳？「睇番以前，我覺得自己好似小學生，一見無咁多人理，就越來越浮誇，搏有人注意。

「結果，觀眾覺得我越來越怪。」

日做夜做越想越亂，有一個階段，直頭唔想再錄音，唔想出唱片，唔想開演唱會，淨係想放假。

「放完假，就決定離開。」

離開就算了，最後悔是講得太多。「一直有人勸我走，話公司俾唔到空間我發揮。咁我都有同出面d人呻，講多左，又搵錯對象，hurt 人都唔知。

「我事後都有搵番老闆（楊受成）道歉。呢方面，我好蠢。」

陳奕迅說，入英皇，是自己揀的，想得到的，又得到了，明知英皇是一個 big family，人多，當然比較複雜。

其實沒有什麼好怨。

一張紙

叫陳奕迅模仿《Star Wars》，是因為大家都有個概念：陳奕迅很貪玩。

果然，一見到道具激光劍，立即急不及待炫耀自己有一把更長更靚的，價值$1,100，玩具反斗城大減價時購入。

做了老豆，身份看似大了，心態分別不大。「最大分別只是再沒有計劃，現在也要為個女籌備一下將來。」

跟徐濠縈多年，陳奕迅說，以前一齊只是單純地為了求開心，有了BB，彼此有一個共同的目標，有一個大家共同關心的對象，關係是密切了好多。「至少要諗下個女的成長、健康，話題都多左。

「還未結婚，不過跟結了婚，也沒有什麼分別。係爭張紙。」

婚，始終會結，但原因不是為了給對方一個承諾，或者名分。「係諗住搵個藉口約齊成班朋友一齊慶祝。結婚喎，咁大件事，一定要出席啦！」

後傳

關於愛女陳康緹，陳奕迅說了另一個故事。

話說陳奕迅陪伴徐濠縈臨盆，目睹BB女一出生，本能地捉住了醫生的衫袖，不肯放手，立即悟出一個道理：「做人，學識放開，就會開心好多。」

陳奕迅認為，要做天下第一，要去到最高，係應該既，但係為工作搞到六親不認，又有什麼意思呢？

「有看過《中華英雄》嗎？俾你做到無敵，連華英雄都打贏埋，最後咪又係要切腹？」

講完。演唱會時間又到，立即獻唱一曲《夕陽無限好》。

望住陳奕迅罕見的認真，唔知點解，突然諗起那個電視廣告，赤裸楊過幫赤裸小龍女草地療傷。

夕陽無限好……