|
陳奕迅學做好父親
為囡囡計劃未來
成報 2005年6月19日
陳奕迅（Eason）今年首次以父親身份過父親節，雖然女兒現在只得八個月大，未懂得祝賀他父親節快樂，但有女萬事足，現在正忙於宣傳新唱片，每日有十分鐘時間跟女兒玩玩已覺滿足，他說女兒現在開始認人，相信女兒是認得他，因為每次女兒見到他都會開心笑。
做父親做到這樣已心滿意足，Eason不是沒歉意說：「冇辦法啦，唯有暫時交畀佢媽咪，如果我依家唔努力，第時佢仲慘，佢嘅生活費都係靠今日，當然人與人嘅相處，最緊要係多啲時間相處，但現階段係我嘅出碟期，都係忙幾個星期，遲啲會有多啲時間，就算依家我都有Family
Day嘅！」
不懂為女兒沖涼
八個月以來，Eason佔最多時間都是跟女兒玩，很偶然沒其他人幫忙下遇着她瀨屎瀨尿，他都懂得換片，但他始終不懂為女兒沖涼，更不懂如何氹她不哭，當初他知道自己要做父親後，不是已要學習如何做一個父親的嗎？他說：「開頭我真係唔識，最初只係關心媽咪身體，唔識得緊張之後嘅嘢，依家開始學細路仔成長計劃，但都係媽咪照顧佢多啲，我要集中喺事業上。」
Eason自言過往是一個沒任何計劃的人，可以說是煮到來就食的人，現在則會慢慢開始計劃，他認真說：「我會一家人諗，唔會淨係諗自己嘅事，佢已經喺我包括計劃之內，諗佢將來讀書嘅嘢。」除為家人計劃之外，他也要學習做一個好父親，但他認為：「每個人都唔同，冇話有一個準則，要同小朋友、屋企人相處時間多啲，先會了解啲，最重要大家可以開心見誠就得。」
《大個女》贈女兒
在新碟中有一首歌《大個女》是送給女兒，Eason不擔心女兒長大後他會變為一個呷醋外父，他相信任由小孩子自由發展，對一個人的身心成長都較好，到時到候，孩子都會知道自己是怎樣的人，做父母想去改變都很困難，所以他說：「呢啲嘢冇得諗，人類經歷幾千萬年，一路演變落嚟，實有啲方式會學到嘢，總有生存方法，唔需要擔心嘅。」
|
