|
我有Say
陳奕迅 男人好狗
壹本便利第700期
22-06-2005
甫踏進影樓，陳奕迅指冷氣機，自顧自說：「『三菱』。好！……夠凍，同我屋企部一樣。」登時諗起電視廣告「××冷氣，幫助孩子平復情緒」。未夠，這位爸爸還會告訴你：以前做人無目標，個女出世，才真正去思考這種事情；免費為電影《老友狗狗》配音，只因「細路唔識睇字幕，配音咪可以合家歡。」老實講，此等表情語氣套諸陳奕迅身上，絕對前所未見。
從狂躁浮誇到今日修身齊家，行年三十，「男人老狗」未到位，做其「好狗」也足以叫人刮目相看。後來他端詳布景的十字架剪影：「要我救邊個？」我答：「樂壇。」明知故問。可是無所謂，反正你未打救別人之前，早已有人救了你。
浮誇
訪問之前，其實有點擔心。
話說早前有傳Eason為某週刊做訪問時，說到他父親陳裘大，因記者一句無心之失，他便得二話不說，拍離場。加上當日其助手在訪問前事先聲明：先談工作，不可以提陳奕迅爸爸，看來更是有可尋。
可是訪問時還是忍不住好奇：犯不拍離場吧？
「其實我明白人人都有八卦心理，但係問得多，話題自然泛濫、失控。講真我預記者會問，但當日他的語氣是：『你阿爸自己都係高官……』
「聽到這兒，連問題也未聽完，我便對他說：『我幫你唔到。』然後除了走，還可以做什麼？」
陳奕迅翻上期《便利》，看到谷德昭，好像有感而發：「我就是不能做圓滑的人，為自己、為別人去打圓場。遇到不爽，總是搞到場面『𤓓』晒，我就是這種人。」
大概怕我看膩他的幸福男人樣，於是他高舉雙手，扮「鬆毛鬆翼」：「還是覺得自己很浮誇。」
「浮誇」？大概應是「浮躁」吧。
冧神
曾經，陳奕迅的確浮躁非常，玩得興起索性露股；有時粒聲唔出，有時發癲喪笑，一度被疑患上「躁狂症」。沉寂一年，陳奕迅過檔第一擊就是連續兩個多月的密集宣傳期。人人以為「狂」人又發威，要咬牙切齒報江山被奪之仇。誰不知除了最初木口木面的「黑帝復仇」，半開玩笑評「新四大天王」外號老土，「好彩冇我份。」看不出輕描淡寫的陳奕迅，戰意有幾高昂。他攤開雙手：「其實我唔覺要攞番啲乜嘢囉。」
當他提起新碟歌曲時，仍不忘勁晒溫馨家庭生活，擺明幸福到瀉。
「其實我錄新歌〈阿牛〉時好辛苦，足足錄兩個月，事關我現時生活好美滿；有家庭、有個女，搵到個自己最愛、佢又肯一直支持我的女人，咁點可以唱到好似〈阿牛〉面『我不甘心』那種慘絕人寰的歌詞？」他扮個苦惱閉目思考狀，「所以次次錄音要培養好耐，要靠幻想去令自己完成錄音。」
兩個月？真係辛苦晒。陳奕迅用最直截了當的方法回應：懶理坊間流言話我女人大使唔黐家，最緊要我當下最愛她。我即時毛管戥，不過徐小姐睇到應該到暈，「E神」轉朵「冧神」應該幾work。
戀戰
可是總覺得「無心戀戰」與陳奕迅之間不會存等號。現時不過30歲（7月27日便31歲），已經有家庭、有事業、有錢有女有愛人，難道自此種花養魚，過埋下半世等埋單？
他想了數秒：「可能心態不同，新碟有人買當然會開心，但我一定以音樂行先。銷量真係不大care。『無心戀戰』談不上，但最初真的覺得自己不夠投入，精神不太集中。」
有說是陳奕迅不太滿意第一首plug的歌曲〈夕陽無限好〉。他也表示最初覺得此曲不夠氣勢，亦不是樂迷期待的「Eason歌」，希望plug〈三個人的探戈〉，可惜公司最後都揀了〈夕陽無限好〉。
首次加盟便出現分歧，不是存在很大問題嗎？
「又沒這樣嚴重。反正最終反應也不錯，證明公司沒有判斷錯誤。有時只會討好自己，我的音樂可能只有幾萬個樂迷欣賞；但公司就會懂得揀一首有十幾萬人會鍾意的歌。只可說我不是生意人，欠缺生意頭腦而已。」
執著
他續說，新碟之所以叫《U87》是因為錄音時只用德國製的Meumann咪，型號「U87」，然後一大堆我似懂非懂的錄音室理論。看得出，陳奕迅在音樂上仍有份執。
不屑做「新四大天王」，言談間又彷彿目空一切以音樂行先。總不成要我相信，陳奕迅入行十年，完全不在乎名利？還是一句到尾，怕跟別人比較？
陳奕迅回應卻是可圈可點：「我想別人留意我的音樂，多於其他一切。這個市場好悶，係咪古巨基唱情歌賣得，就人人都要唱情歌？我只想別人多了解其他不同主題、元素的音樂。老實說，我很怕跟別人比較。記者比較的不是歌手的音樂，而是我們的髮型、衣，有幾多化妝、助手造勢，很無聊。」
「我絕對不是淡泊名利，現實亦不許我這樣做。我之前簽過某間唱片公司，高層見我入行多年仍未捧過TVB最受歡迎男歌星獎，便向我暗示：『係咪想？想我可以幫你喎！』我覺得，這樣獎無意思。自此更覺，做音樂，開心便夠了。其他，不用想那麼多。」
禁忌
整個訪問中，Eason都很累，雙眼通紅，雖然說話仍然「一輪嘴」，卻看得出點到即止，欲語還休。
雖然事先聲明不准提「E爸」，最後也忍不住問：「其實有冇嬲過你爸爸？」
Eason揉揉眼睛，低頭看看上的奶茶，抿起嘴角：「冇。仲比以前更錫佢。係嬲自己惹狗仔隊，令佢無晒私隱！父親節會一齊食飯，希望狗仔隊不會騷擾我。」愈說愈細聲，最後竟近乎耳語。看鏡子的眼神，竟空洞落寞。曾經以為自己會理解他的落寞，其實根本沒資格。
大概有些事情既然說出來也於事無補，也就不應該問。
|
