|
陳奕迅 一戰定生死
落足心機做好《U87》
明報 2005年07月04日
如果連陳奕迅（Eason）這張新唱片《U87》都不能大賣，香港的唱片業也不能生存下去了？沒出唱片一年，他除了精心炮製這張轉了新公司的首張個人大碟外，他也想通了，若再沒機會給他出唱片，他只有做Live，因他自言已是全香港唱片公司在錄音室花最多錢的歌手，所以連這隻碟也賣不成，現在的唱片真的很難做。
自己和公司都落足心機，Eason難免肉緊地說：「做過市場調查，原來大家唔係好恨買好大隻裏面放好多嘢嘅CD，我哋又預早做咗新歌發歌發布會，錄製成DVD連隻碟附送，喺啲大型唱片舖都係賣99蚊，真係好抵買，希望可以刺激市場，仲想點呀？」
凡事雖然作了最壞打算，也有實質事例給予他信心，之前古巨基的唱片賣了超過7萬多隻，證明給他知道只要是好的東西，香港唱片市場是有人買碟，所以他說：「歌手係咪應該檢討，要着重自己唱功，唔應該係第二啲嘢，亦希望傳媒好嘅就要捧，呢個係屬於香港嘅財產。」
保護香港財產
又有一次Eason遇見劉德華，華仔走到面前鼓勵他努力點做好一點，大家都是其中一分子代表香港爭氣，千萬不要失禮。他分析說：「面對台灣、內地、韓國、日本，香港歌手就快冇碇企，最重要係實力，唔係要比較，係要真真正正唱歌，人哋聽到咪係享受，其實韓國、日本唔係特別好，只係佢哋嘅傳媒包裝保護得係佢哋自己財產。不過某程度批評，唔理係善意或惡意，都要真正唱好歌，要諗方法練歌，綵排要認真，唔可以話冇時間練，呢樣好重要。」
不只是香港，全世界都是情歌主導市場，但Eason看過了所有碟評，也聽到很多回應，都讚賞完全跟情歌扯不上關係的《浮誇》，是全隻碟最好聽的一首，就算《夕陽無限好》也是叫人珍惜；《爛》是高難度的快歌；《不良嗜好》是講吸煙這個壞習慣；《葡萄成熟時》是用紅酒比喻人到30多歲才是感情最成熟時刻；到《阿牛》才比較屬於情歌，講一個人如何不甘心放棄伴侶。
口碑銷量同重
「睇晒所有碟評，都會覺得呢隻碟題材新鮮，情歌會有，但使唔使個個歌手都有呢樣嘢？」不過最令Eason感受得到，歌曲種類不是最大問題，而是如何令大家對聽歌產生興趣，他說其實很簡單：「就係做啲嘢出嚟自己享受，人哋自然都會享受，如果夾硬嚟，迫住做，為出碟而出碟，啲人係感受到，休息呢段日子我諗清咗自己，做音樂出唱片係同大家分享，唔係純粹為成名，大家仲唔醒覺？張國榮留底佢嘅熱情演唱會，如果冇熱情，佢唔會着閃令令嘅紅色高跟鞋、裙、長假髮，呢個演唱會真係好睇！」
一開口就提到這張唱片賣不賣，得Eason花了五個月時間做這張碟，都不過是想大家從他的歌得到一些感覺，最主要是得到歡樂及娛樂，至於賣碟成績，是證明得到認同，所以口碑和銷量同樣重要，他慨嘆說：「新歌要有嘢發表，就會有新出現，樂壇好危險，隨時迫到一個地步，唔再接受新歌，就要去酒吧唱Live一啲都唔出奇，唔係消極，係有機會都想佢好，睇依家啲MV拍得冇以前咁好，就係因為冇Budget。」
|
