|
忽略陳奕迅
東Touch 1998年3月24日
文：Lisa
陳奕迅話：「我好鍾意用『忽略』兩個字，唔知點解！」要解釋其實好易，可能Eason（陳的英文名）由出道至今兩年多，曾經有過不少被忽略既經驗。當中例子或者包括：陳奕迅原來有能力可以撼贏黎明，只是觀眾將焦點太集中在天王身上；陳奕迅原來都有能力開concert兼且引起撲飛潮，只係佢唔係當徧歌手冇人報道刋飛有幾好賣；陳奕迅原來仲有能力做一個對音樂好有認識而有實力簕樂壇接班人，只係大家提到接班人，從來唔會數到佢……不過經過呢次訪問，我們都應該從新考慮陳奕迅3個字列人絕不應忽略既藝人名單之中。
忽略一 越級挑戰黎明
先排有報道指有份參與《玻璃之城》（黎明、舒淇主演的新片），飾演舒淇老公既陳奕迅，係唱片公司既安排下，希望佢能夠撼贏黎明唱到電影主題曲。外間人似乎覺得陳奕迅今次有越級挑戰之嫌，Eason自己又點睇？
「Ah……基本上我冇諗過呢樣�禳K…因為係公司安排呢件事，自己都係睇報紙先知……自己從來都冇試過會去唱主題曲，當然有得唱係最好，但Leon唱係應分，始終佢經驗比我好！」
「冇期望過話一定要唱主題曲，只要自己既歌可以配合到套戲既劇情，就算唔係主題曲都冇所謂。正如一段黎明同舒淇既纏綿戲，無啦啦整把陳奕迅既聲出黎可能唔係咁夾，我覺得最緊要係睇導演覺得配唔配合，冇話乜野越級挑戰既！」情況就如《愈快樂愈墮落》一片中亦曾出現陳奕迅的歌曲，Eason話知道後都好開心自己既歌能夠俾導演揀中。
最後得出來的結果是，要撼贏黎明，原來係唔需要有幾千Fans去為你歡呼吶喊；亦唔需要助手、唱片公司保母、化妝師、髮型師十幾廿人係咁係身邊團團轉包圍你。需要既，只係一個睇得起你既導演。至少係電影中，陳奕迅最後都得到咁正既舒淇，贏黎明贏到轟轟烈烈，理你係天王呀！
忽略二 演唱會前後
問Eason知唔知演唱會未正式賣飛前，係Internet上既Newsgroup，有好多人不斷問有關佢演唱會既事？只見佢立即碌大雙眼，有些少難以置信地話：「真既？哎呀，過癮呀！」然後興奮咁話：「我係電腦白癡黎架！Ha
Ha Ha……」
「好開心啦！唔知有咁既反應，希望下次個Concert時間可以長D，自己其實都唔夠喉。不過其實個場細細地（藝術中心可容400人之場地）係幾好，作為一個去睇Show既觀眾，會好投入好Warm。不過如果下次再開Concert，我希望個場地可以大D，多D人可以分享到。」
演唱會前有咁好既反應，演唱會後Newgroup上都有好多迴響，甚至乎有人用幾百字去形容個演唱會有幾正，呢個情況實在好少見。面對一大堆讚美說話，少不免會增強Eason他朝一日踏足紅館既信心。
「好坦白講，相對我理想中既演唱會，紅館實在太大，同埋俾人個感覺都幾商業。我希望同成場觀眾既距離係一樣，唔想坐山頂既朋友連陳奕迅個樣係點都睇唔清楚，咁不如返屋企聽CD仲舒服啦！
「不過如果有機會係紅館開演唱會，一定要好好安排，或者個台有條吊臂可以升起循環咁唱，Ha Ha Ha！」
忽略三 上位實力接班人
「我唔……識……分上位係咩野（然後停頓3秒），只係開心多左人知道陳奕迅係邊個而去聽佢既歌。」可能呢個題目真係太艱深，4分鐘前剛剛將隻艇撐左去大西洋後回岸既Eason續答。
「係咪上緊位？我覺得係俾人認識多左，咁算唔算？我真係唔識答！你覺得我係咪上緊位呢？（係呀！）咁你答左我啦！Ha Ha Ha……有進步係開心，穩步上揚慢慢上（由唱片公司人員代答）。反而Boom一聲咁去到，會有好大壓力，自己未準備好去到一個自己未能夠適應既地步，會幾辛苦。所以而家我咁樣好舒服好開心，係嚮往緊呢個階段。
「天王？我永遠唔識答呢D野。（咁有冇以張學友作為目標？）點解個個用張學友？因為佢不斷係事業上有進步，由香港到台灣呢個更大音樂天空，甚至日本、東南亞，又代表香港同Boy
II Men同台演出……到音樂劇。佢不斷有進步，追求不同既變化，係我既榜樣、目標之一。
「我都係一個一路想繼續去繼續上既人，而家既階段暫時都幾好幾穩定，慢慢做，Ha Ha Ha！」
後記 唉呀！
作為讀者通常都會忽略訪問既由來。話說某日，丙同朋友食飯。甲問丙：「有冇陳奕迅既演唱會飛？」丙未開口，乙已搶閘：「我都好想睇呀！佢唱歌好正，早D講等我陪你睇嘛！」甲第一反應：「唉呀！你唔早D出聲？知唔知上個禮拜佢返St.
Joseph's（陳既母校）唱歌，我專登請左日假唔返工去睇呀！我仲搵佢簽名影相，開心死我！」然後甲問丙：「你會唔會搵佢做訪問？」丙答：「乜你有興趣睇咩？不過我諗暫時唔會。」甲慨嘆：「唉呀！」
或者丙真係曾經或從來都忽略左陳奕迅呢個人，因為以上一番話及係電腦網絡上所睇到外界對陳奕迅既反應，丙決定……
結果，飯局後10日，一個難得陽光普照既下午，香港大學門外一架保母車上，丙身在其中，同陳奕迅面對面……
|
