|
陳奕迅呢一鋪玩認真
東周刊 1999年12月9日
呢個圈鍾意玩既人有好多，佢地通常都帶俾其他人唔少歡樂，「好玩」甚至可以成為佢地既賺錢賣點，因為「歡樂」好多時係要用錢買番黎。就如陳奕迅，就俾人一個貪玩既形象，尤其佢首超人迪加主題曲，係唱Ｋ時既搞笑金曲。佢上台唱情歌時就算幾咁情深款款，隨時又會失驚無神，唱唱下歌玩爆肚，真係唔知俾佢嚇死定笑死。之不過呢個咁鍾意玩既人，其實都有佢認真既一面，特別講到佢既命根——唱歌（當然徐濠縈都係），就會笑住口，好認真咁回答每個問題，令你相信佢原來確係幾認真！
萬人的掌聲
陳奕迅給人的印象總是跑跑跳跳，經常跳跳紮冇時停，好似與霆鋒扮Puffy通街跑，又或者在紅館台上爆肚就知。不過好玩並不代表人見人愛，Eason的負面新聞，尤其指他人紅態度囂的新聞，確又比以前多。
「我心底其實就係一個樂觀既人，之不過我都有唔開心既時候，有時我冇表情，D人就覺得『乜你個人咁架！』證明佢根本就唔熟悉我！我都明白人地冇呢個責任（認識自己），但我相信，如果學友依家無端端發脾氣，我都會覺得冇乜野呀，因為我識左佢十幾年囉喎，由第一隻碟開始就識到依家。我會體諒到佢，人黎架嘛！」不過，不要以為有閒言閒語，說話便會小心起來。
很多時，他依舊會講出一些聽落頗「風涼」的說話。例如講到藝人的頭號夢想——紅館開個唱，他的輕描淡寫便如垂手可得，聽得旁人牙癢癢。「其實我冇期望過，亦冇特別想係紅館開演唱會。有機會咪做囉。不過做左先知。原來一萬人既掌聲真係好鬼好聽，不過我好衰，次次都係之前唔會好珍惜，做左之後先諗『下次再做好些』。」
路邊的野花
演唱過後，Eason對表演事業又有一番體會。「以前覺得十萬人大合唱好勁，好似海嘯咁，但依家覺得一個人楂住支咪，一盞Spot-light打落黎，都可以好似十萬人大合唱咁震撼，只不過係將果種震撼縮成一點。果種Energy（能量），好似係條馬路中間生左一朵好靚既花一樣，雖然車來車往，但就更加顯得朵花靚。」Eason奇就奇在，他說到現在仍未感受過。此種「花」的心頭，確又比許多人高！
唱錯一隻字
當然Eason的好玩，不代表他沒有認真的時候。曾幾何時，初出道時的Eason，給人的印象頗為「古肅」，但Eason希望聽歌的能與歌手一同成長，讓大家知道他在不停轉變。「有次上左海琪既節目，佢話我俾人既感覺，係瞇埋眼就諗到我『王子Look+梳九一分界頭』！但大家會唔會要求我永遠都係咁？」講到尾，在Eason眼裏，最著緊的始終是屬於自己的唱片，因為這是他的歷史，要抹也抹不走。有此想法，原因曾有錯失。「我錄（天下無雙）既時候，唱錯左一隻字（歌詞），但唱錯就係唱錯，出左街冇得返轉頭，我覺得自己好渣，完全冇了解下句歌詞講乜就唱出黎，即係冇心去唱啦！所以呢件事之後，我更執著歌詞係寫乜。」
一場遊戲0者
作為一個樂天派，就算遇到令自己心煩的事Eason亦以輕鬆的心情對待，就連藝人最討厭的跟蹤偷拍，Eason亦以嬉戲態度待之。好以狗仔隊咁有乜好跟先？你要跟，咪當遊戲咁玩囉，大家Enjoy過程之嘛，我會咁諗，蝦，你俾我發現到你，係你渣咋喎！你同我玩，冇野架，咪繼續玩囉，只要唔好搞出意外就得啦！最怕大家心情唔好，Timing唔0岩。不過，最好就梗係唔好跟啦……」雖然如此，與在英國讀書時相比，Eason在香港已經不敢玩得太盡。
「我黎親香港就唔敢玩得太癲！我覺得香港既環境好有壓力，有D野唔係好特別之嘛，好似著人字拖、露底褲有乜出奇0者。係香港係唔可以用最真既模樣示人，你想做人做得真，人地會覺得你係傻既！」Eason此番話不無道理，但想像他「穿人字拖」、「露底褲」，與當日「梳九一分界簕王子Look」的天壤之別，不其然叫人發出會心微笑！
關於徐濠縈
樂觀之人亦會情緒低落，事業方面他總算一帆風順，最不開心的事情只有失戀。今日愛情關係穩定自然冇問題，好像談到他第一次當周刊封面就是被傳媒「踢爆拍拖」，恍如說著別人的笑話，談戀愛態度、老友迫女友上台獻吻等事，亦一派輕鬆大方。「老實講，依家直情係懶得去再搵第二個……愛情好隨意既，分階段囉，依家事業心真係好重，但愛情又唔可以冇喎（太忙點算？）其實最好係當朋友交往，幾忙都要同朋友食飯架！我鍾意佢直直接接，心裏面有乜都會講出黎，我又係一個咁既人，所以咪OK囉……其實我又冇乜必要同人交代，問到想講咪講囉（咁又上台Kiss咁高調？）其實冇刻意架，但做左咪算囉，不過我都話「唔好啦，唔好啦……」咁。」Eason口中雖然「唔好唔好，」，但面前的他，卻是一副幸福小男孩模樣，又笑又怕醜個樣最盞鬼。
陳奕迅愛玩，但講起道理時，其實又可以認真到不得了。所以當佢話唱錯左（天下無雙）果「一隻字」歌詞時，小記亦好認真、又好衰衰咁走去搵番果隻碟出黎聽，又確係唱錯左。不過講真，唔好話我最初聽既時候根本留意唔到，就算我發現封套既歌詞，真係同Eason所唱既唔同，亦都會以為只係印錯歌詞，唔會諗係歌詞，唔會諗係歌手錄音時唔小心唱錯。唔知係咪有野「整定」？呢首歌又諷刺地鬼咁Hit，仲拎左唔少獎，回響幾大。成績好，反而令Eason有D尷尬。
講真果句，有時咁咪仲好，又使乜唔好意思？或者有D野真係「積」番架嘛。Eason最受好評既大碟係《與我常在》，但講到得多獎，就反而係（天下無雙）呢首歌。所以世事有時就係咁，呢次可能唔係最好，但因為以前好評既累積，今時今日反而有收成。所以小記都決定做多D善事，積番多少陰德，有一日可能會中六合彩都未定。
|
