|
陳奕迅以工作麻醉自己
東方日報 2003年12月16日
陳奕迅（Eason ）父親因貪污罪成被收押荔枝角拘留所等候判刑，身為孝順仔的Eason 連日來擔心老父境況，心情大受困擾，只有不停以工作麻醉自己，Eason 昨早才從台灣宣傳返港，下午已馬不停蹄趕上深圳做騷，身心俱疲！
Eason 於昨日早上十時二十分從台灣返抵香港，不知是否擔心父親關係，Eason 連衫都冇心情換，着住前日台灣簽唱會的灰衫紅褲cap 帽步出機場閘口，只是加了一件外套，對於記者追訪，Eason 視若無睹，全程低着頭，默默步上保母車，記者提問：「係咪去探父親？」、「係咪返屋企休息？」Eason 都沉默不語。
Eason 先由保母車送返屋企稍事休息梳洗，換了衫後再坐車去英皇唱片公司，會合容祖兒、鄭希怡和吳浩康坐直通巴到深圳，出席「深圳廣播電台十周年及深圳流行FM107 開播晚會」，Eason 一上直通車，工作人員即拉上車窗簾阻記者拍照，而容祖兒等開車期間人有三急，要衝落車問茶餐廳借洗手間。
Eason 缺席記者會
一行人等到達深圳後即出席傍晚舉行的記者會，但Eason 卻缺席，大會指歌手太攰關係，晚會不安排記者訪問歌手。而Eason 昨晚約九點半出場演唱，全場觀眾歡呼，反應很好，由於得到歌迷支持，Eason 暫將煩惱拋下，面露笑容投入唱歌，還用國語向觀眾問好：「大家好。」當他演唱《聖誕見》時更說：「希望大家唔好過寂寞聖誕，聽完歌就算，祝大家有個開心聖誕。」
|
